УДЫ САГЪÆС

Адæймагмæ афтæ кæсы, цыма æрдз æгомыг у, дзурын нæ зоны. Цымæ уый æцæг афтæ у?

Баурнæд уæ, зынаргъ газеткæсджытæ, æрдзæн дæр ис йæхи æвзаг. Уый дæр зоны улæфын, цард дæттын, у адæймаджы æфсадæг туаггуырæй, донæй, хорæй æмæ алыхуызон хæрздæфгæнаг дыргътæй, халсартæй, кæрдæджытæй.

Уæдæ кæд афтæ у, уæд иуæй-иу æнæрхъуыды адæймæгтæ æрдзы райхъал афон артæндзарын цæмæн райдайынц фæсалыл? Уыдоны аххосæй куынæг кнынц: дыгоппон цъиутæ, хуыргæрчытæ, тæрхъустæ æмæ бирæ хъæддаг мæргътæ, кæцытæ æфтуан кæнынц пыхсыты æмæ лæнчыты. Тæрхъус йæ лæппынтæн æхсыр куы бадары, уæд боны рухсы адæмæй æмæ сырдтæй тæрсгæйæ алидзы æдасдæр ранмæ. Уыцы афон арт исчи куы бандзары фæсалыл, уæд йæ амæттаг бавæййынц гыццыл æнахъом лæппынтæ æмæ иу азæй иннæмæ къаддæрæй къаддæр кæны сæ нымæц. Уæдæ хуыргарк иу уагъд йеддæмæ нæ кæны цъиутæ æмæ йæ æфтуаны æйчытæ куы басудзой, уæд ма цъиутæ куыд рауадздзæн? Азæй аз мæгуырдæр кæны æнæуи дæр æрдз, æмæ ма йыл мах дæр куы æндзарæм арт, уæд нæхи къухæй нæхи сафæм.

Хъæддаг дыргъта: дур-фæткъуы, какон, тырты, мыртгæтæ сты адæймагæн æнæмæнг хъæугæ хостæ. Æмæ цы бæлæстыл, къутæртыл зайынц, уыдон хъахъхъæнын нæ алкæйы хæс дæр у. Уыдон Заманхъулы, Раздзоджы, Бæтæхъойыхъæуы æмæ Даскъофы хъæдтæй фылдæр никуы сты æмæ тынгдæр мæ курдиат уыцы хъæуты цæрджытæм у. Мауал æндзарæм нæ дарæг æрдзыл арт! Нæхи къухæй нæ хурхыл ма хæцæм.

Хорз уаид алы хъæуы дæр арæзт куы æрцæуид иу-дыууæ къорды, кæцыты уæнгтæ сæ хъус дарой æрдзыл чи нæ ауæрды, уыцы адæмтæм æмæ сæ ивар кæной бынæттон хицауады оргæнты кусджытæ.

Æз арæх вæййын хъæды æмæ фæстаг дыууæ азы тæрхъус нал федтон. Уый размæ-иу ацы афон уалдзæджы къордгæйттæй ратæх-батæх кодтой. Афтæ куы æндзарæм арт нæ æрдзыл, уæд нæ кæстæртæн цы баззайдзæн фидæнмæ?

ХЪУЫДАКАТЫ Хъасболат, æхсæнадон уацхæссæг.