26 04ФЫССЫНЦ НÆМ

Цæлык Ирыстоны хъæутæн сæ тæккæ   æрыгондæртæй у.  Ивгъуыд æнусы фæндзайæм азты равзæрд. Фыццаг дур дзы чи сæвæрдта, уыдонæй иу Хабæты Инæрбег уыд.

Уæдæй нырмæ Хуымæллæджы доныл цал кæсаджы аленк кодта, уыйбæрц бирæ сты йæ хорздзинæдтæ йæ уарзон адæмæн. Кæддæры нæргæ бынæттон совхозы бирæ разамонæг бынæтты бакуыста. Къорд  рæстæджыты æхсыры товарон фермæйы сæргъы дæр лæууыд. Кæд ам куыст хорз цыдис, уæд фосдарджыты хæлардзинад æмæ стыр арæхстдзинады руаджы. Канд Рахизфарсы районы нæ, фæлæ нæ республикæйы дæр раззагдæр уыд йæ коллектив. Авд æмæ ссæдз уыдысты хъугдуцджытæ, уыдонæй дыууадæсæй социалистон фæллойы хъазуатонтæ. Инæрбеджы фæлмæн, уæздан ныхас — хъуыддагмæ сæ разæнгардгæнæг.

— Мыггагмæ ницы ис, — зæгъгæиу, арæх загъта, — хъуамæ кæрæдзийы æмбарæм, царды уый ахсджиаг у.

Ис Инæрбегæн йæ бинонты æхсæн дæр адæмы æмбарындзинад. Азтæ Хабæйы фыртыл гыццыл нæ цæуы, фæлæ дзыхы ныхасæй хицæн кæны æмæ иудадзыгдæр хъæубæсты мидæг агуырд хистæр у. Кæстæртимæ та уæлдай зæрдæрайгæйæ сæмбæлы, цы радзура, уый  йæм ис. Фыдыбæстæйы Стыр хæсты азты,  сабыр царды рæстæг разæй цæуджытæй иу уыдис. Абон дæр йæ балæуды уæз, йæ ныхасы фарн ис. Абон  кæм куыстæ, уыцы фермæ нал ис, фæлæ йæ хæдзары дуцгæ фос  дары.  Пайда райсыны тыххæй дæр, стæй змæлы æмæ уымæй йæхи ирхæфсы. Æнæнизæй, æнæнизæй, мæ хæлар!

Дзуццаты Къоста. Къамы  Хабæты Инæрбег.